Нийгмийн хариуцлага

11 дүгээр сарын 20 буюу “Дэлхийн Хүүхдийн Өдөр”-өөр Таван Богд Группийн хамт олон эх орны ирээдүй болсон бяцхан үрсийнхээ төлөө “Ид шидтэй ах эгч” болох аянаа эхлүүллээ.  “Таван Богд Трейд” ХХК-ийн хамт олон хандивын салхийг хагалж компанийн бүх ажилчид хандив өгсөнд ЛАНТУУН ДОХИО ТББ болон “Ид шидийн орон”-оос талархал илэрхийлэн “Ид шидтэй хамт олон” батламжыг гардууллаа. Цаашид “Таван Богд Групп”-ийн нийт ажилчид 100% хандив өгөхөөр болсныг дуулгахад баяртай байна. Бидний өгсөн бяцхан хандив хүнд нөхцөлд байгаа хүүхдүүдэд итгэлийн гэрэл асааж хүйтэнд дулаацах байр, идэх халуун хоол, сурч боловсрох анги танхимтай байлгахад тасралтгүй дэм болж байгаа билээ.  Ид шидтэй ах, эгч нартаа баярлалаа.

“Улаанбаатар Ротаракт клуб” ТББ, “Таван Богд Фүүдс” ХХК-тай хамтран Улаанбаатар хотын асрамжийн газрууд, хөгжлийн бэрхшээлтэй, амьжиргааны түвшингээс доогуур орлоготой айл өрхийн хүүхдүүдэд сэтгэлийн дэм өгөх зорилгоор энэхүү төслийг сар бүр зохион байгуулдаг. Энэ 9 дүгээр сард  “Эх Хүүхдийн Эрүүл Мэндийн Үндэсний Төв”-ийн чихрийн шижинтэй зорилтот бүлгийн нийт 25 хүүхдэд чихрийн шижингийн тест аппарат болон олон үйлдэлт тэргэнцэрийг Амьсгалын тасаг, Мэдрэлийн тасгуудад бэлэглэлээ. Мөн залуу ээжүүдэд хүүхдийн давтамжтай вакциныг цаг тухай бүрт хийлгэх болон нярайг өвчлөлөөс хэрхэн сэргийлэх талаар сургалт орж тухайн тасагт яаралтай үед хэрэглэгдэх эд зүйлс бүхий хайрцагыг бэлэглэсэн юм. Харин 10 дугаар сард хүүхдүүдийн бие бялдар болон оюун санаанд хөрөнгө оруулах үүднээс “ХАЯТТ”-ийн дэргэд гэр бүлийн хүчирхийлэлд өртсөн хохирогч хүүхдүүддээ тусламж үзүүлдэг, 2012 оноос хойш үйл ажиллагаа явуулж буй “Эрхэт баясангуй” хүүхэд эмэгтэйчүүдийн иогийн төвд иогийн анхан шатны хичээлийг мэргэжлийн багшаар удирдуулан заалгаж бие бялдар, тэсвэр хатуужил, оюун санааг тогтворжуулахаас гадна, дотоод сэтгэлээсээ ярилцаж сурахыг заалгасан өвөрмөц өдөр байлаа.

Дэлхийн хүмүүнлэгийн өдрийг тохиолдуулан Галлериа Улаанбаатар төв нь хөгжлийн бэрхшээлтэй хүүхдүүдийн нийгэмд эрх тэгш оролцох эрхийг дэмжих зорилгоор "Children’s Canva Day" өдөрлөгийг 2019 оны 8-р сарын 16-ны өдөр GNM ТББ-тай хамтран зохион байгууллаа.  Уг өдөрлөгөөр хүүхдүүд уран зураг зурж, пицца хийн, хамтдаа цагийг хөгжилтэй, үр бүтээл дүүрэн өнгөрөөсөн юм. Түүнчлэн Пицца Хат Галлериа салбар тэднийг амтат пиццагаар дайлсан бол “Мэдлэгтэй дэвтэр” брэндээс хичээлийн хэрэгсэл бэлэглэсэн юм. Хүүхэд бүхэн жаргалтай байг.

Бидний хувьд аз жаргалын дээд болох хүүхдүүд маань инээд хөөр, баяр баясал, хайр халамжаар дүүрэн өсөх нь хамгаас эрхэм зүйл юм. Тиймдээ ч дэлхийн брэнд KFC нь сар бүр бяцхан хүүхдүүддээ зориулан Гэр бүлийн өдрийг зохион байгуулдаг. Тус өдөрлөгт хүүхдүүд аав, ээж, ах эгч нартайгаа хүрэлцэн ирж, үлгэрийн баатруудын жүжиг үзэж, тэдэнтэй тоглож наадан хөгжилтэй мөчүүдийг хамтдаа өнгөрөөдөг билээ. 7 дугаар сарын 27-ны өдөр KFC Смарт салбарт зохион байгуулагдсан Гэр бүлийн өдрөөр Zootopia хүүхэлдэйн киноны баатрууд сургамжит жүжиг тавьж, илбэ, уран нугаралт, тэнцвэр гээд гайхамшигтай үзүүлбэрүүд боллоо. Мөн хүүхдүүд маань хөгжөөнт тэмцээнд оролцож, KFC брэндийн гарын бэлгийг шагналд нь авсан юм. Дурсамж дүүрэн мөчийг KFC брэндтэй хамт өнгөрүүлсэн хүүхдүүд, аав ээж нартаа баярлалаа.  

Дэлхийн брэнд Пицца Хат нь Монголд нээгдсэний 5 жилийн ойгоо тохиолдуулан, нийгмийн сайн сайхны төлөө "САЙН ҮЙЛСИЙН ОНЦЛОХ 5 АЖИЛ"-г зохион байгуулж байгаа билээ. Эдгээр ажлын нэгээр Пицца Хат-д ажилладаг 100 гаруй оюутнуудынхаа дунд эссэ бичлэгийн уралдаан зарлаж, шалгарсан оюутны сургалтын төлбөрийг 100% төлөхөөр болсон юм. Оюутнууд маань уралдаанд амжилттай оролцож, Шилдэг эссэ бичсэн оюутнаар Пицца Хат Галлериа салбарт ажилладаг зөөгч О. Бат-Эрдэнэ шалгарч, 4,000,000₮-ийн сургалтын төлбөрийн эзэн боллоо.  Түүнээс гадна Пицца Хат брэндийн удирдлагын зүгээс Пицца Хат Их дэлгүүр салбарын ажилтан О.Батсугар, Галлериа салбарын ажилтан Р.Алтантуяа нарын бичсэн эссэг онцолж, нэмэлтээр тус бүрийг 500,000₮-өөр урамшууллаа.  Боловсрол бол хөгжил дэвшил, шинэчлэлтийг авчирдаг гол түлхүүр юм. Тиймдээ ч дэлхий нийтээр эрх тэгш, чанартай боловсролыг тогтвортой хөгжлийн зорилгын нэгээр тавин,  хэрэгжүүлж буй их ажилд Пицца Хат өөрийн хувь нэмрийг оруулахаар зорин ажиллаж байна. Пицца Хат брэндийн зүгээс эрч хүчтэй, цоглог ажилтан, оюутан залуустаа бүгдэд нь баяр хүргэж, цаашдын амьдралд нь амжилт бүтээл, аз жаргал хүсэж байна.

KFC брэндийн хамт олон 2019 оны 6 дугаар сард ээлжит “Тэврэлтийн өдөр”-өө зохион байгуулж, “ГССҮТ–н түлэнхийн тасаг”–т Autoclave – Өндөр даралтын ариутгалын төхөөрөмж, ариутгалын багаж хэрэгсэл, саван, түлэнхийн тос, боолт, нярайн тавиур зэрэг хамгийн хэрэгцээтэй тоног төхөөрөмж, багаж хэрэгслийг хандивлалаа.  KFC брэнд нийгмийн хариуцлагын хүрээнд “Тэврэлтийн өдөр”-г 2014 оноос эхлэн сар бүр тасралтгүй зохион байгуулж байгаа бөгөөд нийгэмд эерэг, дулаахан харилцааг бүрдүүлэх, дэм дэмэндээ амьдрахын сайхныг мэдрүүлэхийг эрмэлздэг билээ. Өнөөдрийн байдлаар Улаанбаатар хотын асрамжийн газрууд, хөгжлийн бэрхшээлтэй иргэд, хүүхдүүд, амьжиргааны төвшнөөс доогуур орлоготой айл өрхийн хүүхдүүд, сургуулийн сурагчдад зориулан дэмжлэг үзүүлж, 6-18 насны 1,500 орчим хүүхдэд халуун дулаан тэврэлтийг бэлэглээд байна. “Тэврэлтийн өдөр” болон нийгэмд хандсан сайн үйлсийн ажилд KFC брэндийн хэрэглэгч, үйлчлүүлэгчдийн маань худалдан авалтын тодорхой хэсэг зориулагддаг гэдгийг онцолж, хэрэглэгч, үйлчлүүлэгчдээ гүн талархал илэрхийлье.