Мэдээлэл

Онцлох ажилтан ярилцлага- “Говь ” ХК-ийн Угаах машин баригч Б. Галбадрах

 “Говь ” ХК-ийн Угаах машин баригч Б. Галбадрах Хөнгөн үйлдвэрлэлийн салбарын Гавьяат   Таван Богд Группийн “Онцлох ажилтан” ярилцлагын энэ дугаарын зочноор “Говь” ХК-д 41-дэх жилдээ ажиллаж буй Б. Галбадрах ах маань оролцож, бидэнд олон жилийн дурсамж, туршлагаасаа хуваалцлаа. Тэрээр 2018 онд Монгол Улсын Ерөнхийлөгчийн зарлигаар Хөнгөн үйлдвэрлэлийн салбарын Гавьяат-р шагнуулсан билээ. Та бидэнд өөрийнхөө талаар  товч танилцуулаач? Ах нь 1951 онд төрсөн, эхнэр гурван хүүхэдтэй. Сургуулиа төгсөөд хамгийн анх Төмрийн завод-д 10 жил “Токерчин” хийж байлаа. 1979 онд Хүнс, хөдөө аж ахуй, хөнгөн үйлдвэрийн яамнаас тэргүүний ажилтнуудыг нь сонгон шалгаруулан Говь ХК-д ажиллах санал тавьж байсан юм. Тэр үеэс л миний амьдрал Говь ХК-тэй салшгүй холбоотой болж өнөөдөр 41-дэх жилдээ ажиллаж байна. Таны ажлын онцлог юу вэ? Говь ХК-ийн эцсийн ноолууран бүтээгдэхүүн гарах хүртэл маш олон үе шат, процесс явагддаг. Миний ажлын хувьд тэдгээр процессын хоёр дахь үе шат буюу ангилан ялгасны дараа “угаах” дамжлага дээр ажилладаг. Ялгасан ноолуурыг угаах машинаар дамжуулан цэвэрлэж, бохирдолгүй болгох гол үүргийг гүйцэтгэдэг. Энэ ажлыг хийхийн тулд зориулалтын тоног төхөөрөмж буюу угаах машиныг маш сайн ажиллуулж чаддаг байх хэрэгтэй.  Миний хувьд ЗӨӨЛӨН АЛТ гэгдэх ноолуурыг угааж, цэвэрлэн хэрэглэгчдийн гарт очиход хувь нэмрээ оруулж байгаадаа баяртай байдаг. Ажиллах хугацаанд бүтээсэн хамгийн гоё дурсамжууд тань юу вэ? Сонирхолтой түүхүүдээсээ хуваалцвал? Хамгийн анх Говь ХК-д ороход нийтдээ “Анхны 30” хүн Япон улс руу явж 2 сарын коллежийн сургалтанд сууж байсан юм. Японд текник, технологиуд дээрээ хэрхэн ажиллах талаар суралцахын хамт ноолуурын үйлдвэр, мөн үйлдвэрийн эд ангийг үйлдвэрлэдэг үйлдвэрүүдтэй  танилцсан. Япон явахын өмнө хялгас ялгах машины засварчнаар ажиллаж байтал дарга маань ирээд угаах машины сургалтад явах хүн хэрэгтэй байна гэдэг юм байна. Хялгас ялгах машин дээр ажиллана гээд сэтгэл шулуудчихсан байсан тул манай хэдээс дуугарч байгаа хүн ч алга. Тэгэхээр нь би “Угаах машин” дээр ажилласан ч яахав дээ гэж бодоод “за би явъя аа” гэж билээ. Ингээд л зарим нь инженер, цахилгаанчнаар харин би угаах машины засварчны мэргэжлийн сургалтад суралцахаар Futaba угаах машины үйлдвэр рүү салж явсан даа. Суралцах хугацаанд хэлний болон соёлын ялгаанаас болоод зөндөө л хүндхэн, хөгтэй явдлууд тохиолдож байсан даа. 1979 онд Японд очиход аль хэдийн автоматаар онгойдог шилэн хаалга хэрэглээд эхэлчихсэн байж билээ. Бид тэрийг нь мэдэлгүй шилэн хаалгыг нь очиж мөргөж байснаа одоо ч санадаг юм. 41 жил  Говь ХК-тай амьдралаа холбон,  ажиллахад тань юу нөлөөлсөн бэ? Говь ХК маань жил ирэх тусам л нүдэн дээр өсөн дэвшиж, урагшилсаар, хамгийн орчин үеийн гэсэн шинэ тоног, төхөөрөмжийг үйлдвэрлэлдээ нэвтрүүлэн байнга  шинэчлэлтүүд хийгдэж, сайжирч байдаг. Мөн ажилтан нэг бүрийг анхаарч, тасралтгүй хөгжүүлэхийг эрмэлзэж, сургалт байнга хийгддэг.  2000 илүү ажилтантай учраас бүх зүйл өндөр зохион байгуулалттай явагдаж, аюулгүй ажиллагаа, эрүүл ахуйн сургалтуудыг ч бас чухалчлан үздэг. Мөн дурдахгүй өнгөрч болохгүй нэг зүйл бол намайг ажиллаж байсан хугацаанд ажилтнууддаа цалингаа үргэлж цагт нь олгодог явдал юм. Энэ жижиг зүйл мэт боловч маш чухал зүйл.  Хамт олон маань ч маш сайхан нээлттэй, хоорондоо найрсаг, хүндлэлтэй хамтран ажилладагт талархаж явдаг. Хамгийн гол нь байгууллага маань намайг ажлаа хийж чаддаг болтол нь мэргэшүүлээд, сургаад авч байсан шүү дээ.  Олон зүйлрүү үсчилгүй мэргэшсэн ажлаа хэнээс ч илүү төгс хийгээд ажиллах нь өөрөө гайхамшигтай чанар юм.  “Хүн хийж чаддаг зүйлээ олоод ТУУШТАЙ байхад л амжилт өөрөө ирдэг” гэж боддог.  “Хөнгөн үйлдвэрлэлийн салбарын Гавьяат” гэсэн эрхэм хүндтэй шагнал аваад төрсөн сэтгэгдлээсээ хуваалцана уу?  Японоос ирээд хийсэн анхны ажил маань үйлдвэрийн дээвэр дээр агааржуулалтын монтаж хийх байсан санагдана. Энэ үеэс өдөр хоногууд өнгөрсөөр нэг л мэдэхэд Говьдоо ажиллаад 41 дэх жилийнхээ нүүрийг үзэж байна. Улс маань ч энэ их хөдөлмөрийг маань үнэлж 2018 оны 12 дугаар сард Монгол Улсын Ерөнхийлөгчийн зарлигаар Хөнгөн үйлдвэрлэлийн салбарын Гавьяат -цолоор шагнасан юм. Уул нь байгууллага маань анх 2006 онд гавьяатаар тодорхойлж байсан юм билээ. Говь ХК-аас төрөн гарсан 5 дахь гавьяат болсноороо би их л баярлаж явдаг даа. Говь ХК-ийн  ирээдүйн талаар та юу гэж боддог вэ? Говийн үйлдвэрээс гарсан эцсийн бүтээгдэхүүн дээрх шошгыг харахад их л гоё, урамтай байдаг. Надаас гадна маш олон хүмүүсийн хүч, хөдөлмөр зарцуулан, Монгол улсаараа овоглосон  бүтээгдэхүүн ингээд гадаадын улс орнуудад худалдаалагдаж байна гэж бодохоор л үнэхээр бахархалтай, сайхан санагддаг шүү. Говь брэнд дэлхийн олон улс, орнуудад худалдаалагдаж дэлхийн ноолуурын салбартаа тэргүүлж, дэлхийд танигдсан монгол ноолуурын брэнд болж чадна гэдэгт итгэлтэй байдаг. Анхны алхмуудаа ч амжилттай хийж, олон улс оронд дэлгүүрээ нээхээс гадна онлайнаар худалдаалж эхэлсэнд ГОВЬ-ийн ажилтан бүр баяртай байгаа. Өөрсдөөрөө, хамт олноороо бахархаж байна. “Онцлох ажилтан” ярилцлагад өөрийн дурсамж, түүхээсээ бидэнтэй хуваалцсан Говь компанийн Тав дахь Гавьяат, Б.Галбадрах танд нийт уншигчид болон Таван Богд Группийн хамт олныхоо өмнөөс талархал илэрхийлье.  

СЭТГЭЛ ШИГ ЦАГААН ГУРИЛАА ХҮМҮҮСТ ТҮГЭЭХ ХАМГИЙН САЙХАН

“Таван Богд Групп”-ийн 2019-н оны “Тэргүүний ажилтан” Б. Ялалтбаяр Энэ удаагийн ярилцлагын зочноор “Улаанбаатар Гурил” ХХК-д ачигчаар ажиллаж буй Б.Ялалтбаяр оролцлоо. Тэрээр “Улаанбаатар Гурил” ХХК-д тасралтгүй 10 жил ажилласан ба 2019 оны Таван Богд Группийн тэргүүний ажилтнаар шалгарсан юм. Таны ажлын онцлог юу вэ? Миний ажлын хувьд Дарханы үйлдвэрээс вагоноор ирсэн гурилаа агуулахдаа буулгах, өндөрлөх, түгээлтийн машинуудад падааны дагуу ачилт хийх гэсэн ажлуудыг голчлон хийдэг. Гол онцлог нь хөдөлгөөн шаарддаг ажил гэж боддог. Ер нь хүн хөдлөөд л байвал гоё шүү дээ. Эмнэлгээр явахад хүртэл өвчин байдаггүй бүр цоо эрүүл, чийрэг байдаг. Ачигч хийхэд тодорхой хэмжээний ур чадвар, туршлага, аюулгүй ажиллагаа  шаардагддаг учраас бид нар компаниас зохион байгуулдаг сургалтуудад хамрагдаж өөрсдийн мэдлэг, ур чадвараа дээшлүүлдэг. Мөн Хөдөлмөрийн аюулгүй байдал дээр бусад ижил төстэй газруудыг бодвол илүү их анхаардаг тул бид маш сайн дагаж мөрддөг. Таны ажлын нэг өдөр хэрхэн өнгөрдөг вэ? Миний ажлын нэг өдөр их гоё, сонирхолтой өнгөрдөг шүү. Өглөө бүр дүрэмт хувцсаа өмсөөд, өглөөний хурлаа хийн, Хөдөлмөрийн аюулгүй байдлын зааварчилгаа аван гарын үсэг зураад, ажлаа эхлүүлдэг. Манай хамт олны ихэнх нь шижигнэсэн сайхан залуучууд байдаг болохоор өдөр маш хурдан өнгөрдөг. Жишээлбэл вагон ирэх үед залуучуудтайгаа уралдаж гурилаа зөөнө гээд л сонирхолтой, хөгжилтэй зүйлс их болдог. Манай ачигчид өдөрт 600 тн гурил ачиж буулгадаг. Ингээд бодохоор үнэхээр ажилсаг, мундаг чадалтай залуус байгаа биз? Ер нь хамт олны уур амьсгал их гоё байдаг тул ажлаасаа кайф авдаг.  Өглөө орж ирэхдээ бүгдээрээ гоё инээлдэнэ, орой тарахдаа ч бас сайхан инээлдэцгээгээд л гардаг. Тийм болохоор ажлаа хийхэд ядрах зүйл огт байдаггүй. Хамгийн гоё нь манай хамт олон нэг нэгэндээ их дэмтэй, нийтэч, хөгжилтэй, энгийн хүмүүс байдаг аа. Бид ингэж гоё хамт олон болж чадсан учраас манай ачигчид их вагонтой үед өөрсдийн санаачилгаараа үүрээр 04:00 цагт хүртэл ирж вагоноо буулгах тохиолдол байна шүү дээ. Тэгээд л бидэнд чинь манайхнаас урмын, талархлын үг ирж өгнө дөө. Ёстой бахархмаар. “Улаанбаатар Гурил” ХХК-ийн бусад компаниудаас ялгарах онцлог таны бодлоор юу вэ? Манайхан хүн бүхэнтэй Сайн байна уу? гээд мэндчилдэг  нийтэч хүмүүс байдаг.  Мөн бүх зүйл нь цэвэрхэн, цэгцтэй байхаас гадна бидний өмсөж буй дүрэмт хувцас үргэлж бүрэн бүтэн, цэвэр байдаг. Манай компани чинь Монгол улсын №1 гурилын үйлдвэр, тэгэхээр №1 гурилын үйлдвэрт ажиллаж байгаа ачигч чинь бас л №1 байхгүй бол болохгүй шүү дээ тээ /инээв/. Бид бас өөрсдөө өөрсдийнхөө рекордыг эвдэнэ, шинэ рекорд тогтооно гээд л хичээж ажилладаг. Энэ бүхэнд миний зүгээс өчүүхэн ч гэсэн хувь нэмрээ оруулж байгаадаа баяртай байдаг. Үнэхээр сайн ч гурил сайхан ч хамт олон. Миний хувьд СЭТГЭЛ ШИГ ЦАГААН ГУРИЛАА ХҮМҮҮСТ ТҮГЭЭХ ХАМГИЙН САЙХАН санагддаг. Та ажлын гараагаа эхэлж буй хүмүүст юу гэж зөвлөмөөр байна? Магадгүй анх ажлаа хийж эхлэхэд ядрах, шантрах үе гардаг байх. Миний хувьд тиймэрхүү зүйл огт мэдрэгддэггүй. Бидэнтэй хамт нэг сар ажиллахад л хамт олонтойгоо уусаад инээлдэж, хөхрөлдөөд л харин ч ядрахаасаа илүү ажлаасаа гоё энерги авдаг болчихдог. Залуучууд маань нэг газар үр өгөөжтэй, тогтвор суурьшилтай ажиллаж хамт олонтой, ажилтай төрөлтэй байхын гоё сайхныг мэдрээсэй гэж боддог. Ярилцлагын сүүлийн хэсгийг танд үлдээе Миний хувьд байгууллагадаа, хамт олондоо баярлалаа гэж хэлэхийг хүсэж байна. Учир нь манай байгууллагын удирдлагууд, хамт олон маань ямар ч цаг үед бидэнд сэтгэлийн дэм өгч, урамтай сайхан үгсийг харамгүй хэлдэг. Тиймээс миний хувьд Улаанбаатар Гурил ХХК-даа ажиллахдаа үргэлж баяртай байдаг шүү та бүхэндээ чин сэтгэлээсээ талархаж байгаагаа энэхүү ярилцлагаар илэрхийлж байна. Бидэнд цаг гаргаж ярилцлага өгсөнд баярлалаа. Цаашдын ажилд тань өндөр амжилт хүсье.  

БАРИЛГЫН ЗУРАГ ТӨСӨЛ ЗОХИОХ ТЕНДЕР ЗАРЛАГДЛАА

Хан-Уул дүүргийн 15-р хорооны нутаг дэвсгэрт баригдах Орон сууц, үйлчилгээний зориулалттай иж бүрэн барилгын зураг төсөл зохиох гүйцэтгэгчийн сонгон шалгаруулалтад оролцохыг “Таван Богд Проперти” ХХК-с урьж байна. Энэхүү тендер нь хоёр үе шаттай явагдах ба ажлын туршлага, техникийн нөхцөл зэрэг үзүүлэлтийг хангасан оролцогч талуудад хоёр дахь үе шатанд оролцох саналыг хүргүүлнэ. Тендерт оролцох хүсэлтэй байгууллагууд удирдамжийн дагуу материалуудыг бүрдүүлэн тендерийн битүүмжилсэн хайрцагт хийнэ үү. Тендерийн талаар дэлгэрэнгүй мэдээллийг албан бичгээр эсвэл доорх и-мэйл, утсаар холбогдон авах боломжтой. И-мэйл хаяг : tender@tavanbogd.com Утасны дугаар: 9410-0767, 8850-6644

KFC ТЭВРЭЛТИЙН ӨДРӨӨР 35-Р СУРГУУЛИЙН ХҮҮХДҮҮДЭД ХАРААНЫ ШИЛ БЭЛЭГЛЭЛЭЭ

       “KFC” брэнд “Улаанбаатар Ротаракт клуб” ТББ-тай хамтран 11 сарын 24-ний өдөр нийслэлийн Сүхбаатар дүүргийн 35-р сургуулийн I-III ангийн хүүхдийг нүдний үзлэгт хамруулан, шил зүүх нэн шаардлагатай хүүхдүүдэд нүдний шил бэлэглэлээ.          KFC брэнд нийгмийн хариуцлагын хүрээнд хэрэгжүүлдэг “Тэврэлтийн өдөр” нь 2014 оноос эхлэн сар бүр тасралтгүй зохион байгуулагдаж байгаа бөгөөд энэ сарынх “Улаанбаатар Ротаракт клуб”-ийн санаачилсан “Eye See” төсөл хөтөлбөрийг дэмжин ажилласнаараа илүү онцлог болж олон хүүхдэд сэтгэлийн дэм хайрлалаа.

Ахмадууддаа сар шинийн баярыг угтаж бэлэг гардууллаа

Таван Богд Групп-д ажиллаж, түүх бүтээлцсэн ахмадууддаа сар шинийн баярыг угтаж бүтээгдэхүүний гарын бэлэг гардуулж, талархлын баярын үйл ажиллагааг жил бүр уламжлал ёсоор зохион байгуулдаг билээ. Энэ жил бүх нийтийг хамарсан үйл ажиллагаа зохион байгуулахыг хориглосон тул ахмадууддаа зорьж очин гарын бэлэг гардууллаа.  Хуучнаар авто засварын заводод ажиллаж байсан болон “Таван Богд Групп”-д ажиллаж байгаад гавьяаныхаа амралтад гарсан ахмадууддаа нийт 84 ахмадууддаа Хулгана жилийг угтан Таван Богд Группийн хүний нөөцийн газраас хүндэтгэл үзүүлсэн юм.  Хамтын хүч-Амжилтын түлхүүр Таван Богд Групп